Pelsjas horries

Op my tweede dag in Perth, kry ek toe so koud dat ek in tweehandse klerewinkels begin soek na iets lekker warm om te dra. Die truie in die winkels was maar lelik en uitgedra, toe sien ek die pelsjas.

Dit het so heerlik sag en warm gevoel, en dit het gepas, bowendien was dit net 40$. Gedagtes van wreedheid teen diere en greenpeace het soos klokke in my kop gelui, maar aai die jas was so saggies warm.

Die verkoopsdame kon nie my navraag oor watter dier se pelse dit was antwoord nie, maar n ou tannie in die winkel het gesê dat dit hasie's was en dat die spesifieke hasie jas styl hoog mode was so 20 jaar gelede, en dat haaspastei van die diere se vleis gemaak is.

Ek het die jas dadelik aangetrek, en terug by die hotelkamer toe ek instap en Tron my in die jas sien, het hy sowaar tot my skok weggetrek met die wysie " Cruella de Ville , if she doesn't scare you, no evil thing will.." nou ja, ek was redelik teleurgestel dat hy die situasie so opmerkend opgesom het. Jan het uitgebars van die lag met, ha, uit die mond van die kind kom die waarheid.

In die volgende paar dae is daar deur vreemdelinge aan my opmerkings gemaak oor die jas, eerstens deur n meisie in n musiekwinkel en die tweede keer deur n man in n kafee, "that is a lovely animal".

Ek het baie skuldig gevoel, ek wat beskermer van miere, goggas, wurms en al die diere van die aarde is.

Ek regverdig die pelsjas met die volgende redenasie: Die hasie is gejag en geslag, die vleis geëet en die pelse gebruik om die jas te maak. Die slagtings is gepleeg in n era toe jag en slag die orde van die dag was om kos op die tafel en klere op die lyf te kry. Die hase is klaar dood, lankal al, hoekom moet die pelsjas nou net eenkant gesmyt word, ongebruik ? Dit is mos tragies dat die hase se pelse nie waardeer kan word nie.

Ek sal die haas se jas dra, in herbinnering van die haas self. Ek sal die pels nie in die publiek dra nie, in vrees dat iemand n emmer bloed op my gooi, ek sal dit wel in my eie huis dra en na goeie vriende se huise.

storie deur Vyg Fynbos